2011 سنه مش زى اى سنه مرت فى عمرى سنه علٌمت فيا وأكيد فى كل مصرى سنه ممكن اكون اتعلمت فيها اللى متعلمتوش فى عمرى كله ومريت بمواقف غريبه محصلتليش قبل كده , مكنتش متخيل ان هاييجى يوم ويبقى فى يومى مرواح المشرحه عادى والمشى فى الجنازات اشبه بالفسح والمسيرات بقت هى الحاجه اللى تديك طاقه لليوم اللى بعده, كل ده متخيلتش فى يوم انه يبقى شكل يومى من الاساس, وبرغم انى عدت عليا ايام سوده ومعنويات الواحد كانت بتبقى فى الضياع الا انى مفقدتش الامل فى بكره وانه لازم هايبقى افضل واحسن واللى كان بيساعدنى فى ده اصحابى اللى بعتبرهم هما المكسب الاهم ليا من 2011 واللى قال معرفه الناس كنوز فعلا مكدبش البنى ادم النضيف اعظم من اى كنز , وفى زمننا ده انك تلاقى ناس نضاف بقت عمله نادره تخيل لما تلاقيهم بيقعوا فى سكتك بالكوم ,على قد ما فى ناس شايفه سنه 2011 سنه كوارث وسنه مش كويسه وحصلت فيها مصايب كتير ده من وجهه نظر ناس كتير الا انى شايفها من احلى سنين عمرى على الرغم انى خسرت فيها من الناحيه الماديه كتير بس عادى الفلوس بتروح وتيجى لكن محدش يقدر يرجع لحظه فاتت من عمرك , وبالمقارنه بناس تانيه خسرت عينيها وناس تانيه خسرت حياتها ف انا مخسرتش اصلا بالعكس ده هما الكسبانين وانا الخسران , اللى خسر عينه سبقته ان شاء الله ع الجنه واللى خسر حياته ف ده شهيد حى عند ربنا فى منزله الانبياء أما انا ف مستنى دورى ويا نكمل ثورتنا يا نموت شهداء حريتنا .
خلاصه الامر ان 2011 سنه غيرت فى التاريخ كتير والحمد لله انى حضرت سنه تاريخيه زى دى وشاركت فى كتابه تاريخ بلدى من جديد مع أطهر شباب جابتهم مصر وهابقى فخور وانا بحكى لولادى "ده لو عشت يعنى" اننا كان بيتقال علينا شويه عيال وشويه العيال دى هى اللى زلزلت عرش الظلم والجبروت واسقطت رأس النظام وجارى اسقاط باقى ازرع النظام فى 2012
.... و لازم يسقط حكم العسكر
ليست هناك تعليقات:
إرسال تعليق